Lajmi se qeveria shqiptare i ka kërkuar Gjykatës së Strasburgut që të deklarojë si të papranueshme ankimet e pronarëve shqiptarë pranë kësaj gjykate, përbën një skandal tjetër që provon mjerimin e drejtësisë, në radhë të parë, në kokën e qeverisë.

z. Andrea Stefani

T’i kërkosh një gjykate europiane që të marrë vendim jo në përputhje me të drejtën, por ashtu si i volit qeverisë! A nuk është e gjithë kjo një provë alarmante se çfarë koncepti totalitar për drejtësinë “e pavarur” kanë në Tiranë? Është në thelb koncepti bolshevik i rrënjosur për 45 vjet në Shqipëri, sipas të cilit, gjykata nuk jep drejtësi ashtu si e mendon gjykata vetë, por në përputhje me direktivën e partisë në pushtet dhe qeverisë së saj. Dikur këto direktiva ia jepte në Shqipëri gjykatave Partia Komuniste e Punës, ndërsa sot, pas 20 vjetësh nga vithisja e komunizmit, është qeveria e Partisë “Demokratike” që përpiqet t’i japë direktiva Gjykatës së Strasburgut, se çfarë lloj drejtësie duhet të japë! Çmenduria politike e qeveritarëve në Tiranë, epshi autoritarist për të komanduar gjithçka ka arritur një rekord: pasi kanë kapur thuajse të gjithë pushtetin gjyqësor në vend, qeveritarët e Tiranës duan ta komandojnë edhe Gjykatën e Strasburgut. Dhe janë po ata qeveritarë që e kanë zhytur Shqipërinë prej një viti në krizë, duke penguar transparencën e zgjedhjeve në “respekt të pavarësisë së gjykatave”.